Fimm karlar voru á dögunum dæmdir í samtals 45 ára fangelsi fyrir hrinu bíræfinna rána í Bretlandi frá mars 2018 og fram í febrúar á þessu ári.
Mennirnir beindu sjónum sínum einkum að hraðbönkum í Bretlandi þar sem þeir komu fyrir öflugu sprengiefni. Þeir sprengdu hraðbankana, alls 15 talsins, í loft upp og komust undan með upphæð sem samsvarar tæplega 70 milljónum króna.
Lewis Murkin, Philip Clarke, Ryan Wilson og Michael Cash fengu 10 ára dóm hver en fimmti maðurinn, Martin Goldstraw, fékk fimm ára dóm.
Eðli málsins samkvæmt ollu sprengingarnar miklu tjóni og þá tókst lögreglu aðeins að endurheimta níu milljónir króna af ránsfénu.
Mennirnir notuðu gas til að framkalla sprengingarnar og þá stálu þeir bílum sem þeir notuðu við verknaðinn. Þegar sprengingarnar voru afstaðnar notuðu þeir kúbein, axir og önnur tól til að ná peningunum.