Móðir hans, Sheila O‘Leary hringdi í neyðarlínuna þegar hún fann drenginn kaldan og líflausan. Eiginmaður hennar reyndi að lífga hann við en án árangurs og var hann úrskurðaður látinn skömmu eftir að sjúkraflutningamenn komu á vettvang.
Þegar lögreglumenn ræddu við Sheila sagði hún þeim að fjölskyldan borði aðeins ávexti og grænmeti. Drengurinn hafði að hennar sögn ekki borðað í eina viku og hafði hún því gefið honum brjóst í eina mínútu skömmu áður en hann lést. Andardráttur hans varð þá veikari og veikari en hún gerði ekkert í því og sofnaði sjálf.
Lögreglumenn tóku eftir því að hin tvö börn hjónanna, þriggja og fimm ára, voru föl og með gulleita húð. Við læknisskoðun kom í ljós að þau voru í neðstu mörkum þess sem telst eðlileg þyngd barna á þessum aldri. Annað þeirra var einnig með svartar tennur.
Í húsinu var einnig 11 ára stúlka sem er dóttir Sheila af fyrra sambandi. Hún var við betri heilsu en systkin hennar því hún fór til föður síns í tvær vikur annan hvern mánuð og fékk meiri næringu af þeim sökum.
Yngri börnunum tveimur hefur nú verið komið í umsjá barnaverndaryfirvalda en elsta stúlkan er flutt til föður síns.
Hjónin eru grunuð um að hafa orðið drengnum að bana og að hafa valdið hinum börnunum skaða með því að sjá ekki til að þau fengju nægilega mikla og góða næringu. Réttarhöld yfir þeim hefjast 9. desember.