Kristoffer Johansson, 23 ára Sví, var dæmdur í tíu ára fangelsi 2014 fyrir að myrða fyrrum unnustu sína, Vatchareeya Bangsuan, og hluta lík hennar í sundur. Eftir að hann hóf afplánun dómsins byrjaði hann í kynleiðréttingarferli og heitir nú Kim Marie Johansson. Nú hafa sænsk yfirvöld veitt henni heimild til að afplána refsingu sína í kvennafangelsi.

Aftonbladet og Expressen skýra frá þessu. Fram kemur að Kim hafi verið flutt í kvennafangelsið Hinseberg síðastliðinn mánudag.

Dag einn árið 2013 fór hin tvítuga Vatchareeya Bangsuan út að hlaupa nærri Boden en skilaði sér ekki heim. Lögreglan hóf umfangsmikla leit að henni. Eftir tveggja vikna leit fundust líkamshlutar hennar dreifðir um skóglendi og nokkrir fundust á eyðibýli. Rannsókn leiddi í ljós að hún hafði verið stungin til bana og síðan hafði lík hennar verið hlutað í sundur.

Sjónir lögreglunnar beindust fljótlega að fyrrum unnusta hennar, Kristoffer Johansson. Hægt var að tengja hann við morðið vegna blóðbletta sem fundust. Í janúar 2014 var hann dæmdur í 14 ára fangelsi vegna morðsins í undirrétti en hofrétturinn mildaði refsingu hans í 10 ára fangelsi.

Í umsókn sinni um að fá að afplána refsinguna í kvennafangelsi sagði Kim að hún væri orðin þreytt á kynferðislegri áreitni frá samföngum sínum. Hún hafði verið látin sitja í einangrunarklefa til að tryggja öryggi hennar. Beiðni hennar var í fyrstu hafnað en síðan var þeirri ákvörðun breytt og hún er nú komin í kvennafangelsið eins og fyrr segir. Hún á möguleika á að verða látin laus til reynslu þann 24. janúar 2020.