Bandaríska alríkislögreglan FBI hefur komið upp um umfangsmikið svindl með tæki frá Apple, til dæmis iPhones og iPads. 11 hafa verið handteknir vegna málsins og þrír eru eftirlýstir. Fólkið tilheyrir skipulögðum, alþjóðlegum glæpasamtökum sem standa á bak við fjölda svikamála, samsæra, þjófnaða á persónuupplýsingum og peningaþvætti í tengslum við svikin með tækin frá Apple. Umfang svikanna hleypur á milljónum dollara.

Þetta kemur fram í ákæru á hendur fólkinu. Þar kemur fram að samtökin hafi flutt rúmlega 10.000 falsaða iPhone og iPad frá Kína til Bandaríkjanna og Kanada. Tækin voru síðan eyðilögð og skipt í verslunum Apple um öll Bandaríkin og Kanada. Í staðinn fyrir fölsuðu og ónýtu tækin fengust ekta tæki frá Apple sem voru síðan flutt úr landi, þar á meðal til Kína, og seld með góðum hagnaði.

Apple tæki eru með raðnúmer og svokallað International Mobile Equipment Identity (IMEI) sem eru einstök númer fyrir hvert og eitt tæki. Í málinu virðast svikahrapparnir hafa sett slík númer af ekta tækjum á þau fölsuðu. Númerin, sem þeir notuðu, tengjast tækjum sem voru seld í Bandaríkjunum og Kanada. Af þessum sökum eru hin handteknu einnig sökuð um þjófnað á persónuupplýsingum.

Apple telur að svikin hafi kostað fyrirtækið að minnsta kosti sex milljónir dollara.

Hin handteknu eru bandarískir ríkisborgarar en fædd í Kína, Víetnam og Rússlandi.