Aðfaranótt þriðjudags réðust um 10 manns á 18 ára sænskan pilt í Landala í miðborg Gautaborgar. Pilturinn var þvingaður inn í bílskúr þar sem árásarmennirnir skáru annað eyra hans af honum. Að því loknu stálu þeir öllu af honum nema nærbuxunum sem hann var í.

Sænska ríkisútvarpið skýrir frá þessu. Haft er eftir talsmanni lögreglunnar að þetta hafi verið ansi óvenjulegt rán. Ekkert bendir til að pilturinn þekki árásarmennina.

Enginn hefur verið handtekinn vegna málsins.

Mörg rán hafa verið framin í Gautaborg á undanförnum árum. Frá janúar til september 2015 voru 530 rán framin í borginni en á sama tíma á þessu ári voru þau 713. Talsmaður lögreglunnar segir að ákveðinn hópur stundi það að ræna unga menn sem eru einir á ferð.