Flugfélögum er heimilt að taka hátt gjald fyrir að breyta nöfnum á flugmiðum. Þetta kvað umboðsmaður neytenda í Danmörku upp úr um nýlega. Það getur því verið dýrkeypt að skrifa rangt nafn þegar flugmiðar eru keyptir á netinu.

Flugfarþegi hafði kvartað til umboðsmannsins yfir því að hann var krafinn um sem svarar til um 35.000 íslenskra króna fyrir að breyta eftirnöfnum tveggja farþega. Af þessum sökum varð ferðin til Kanaríeyja töluvert dýrari en lagt var upp með.

Í niðurstöðunni kemur fram að gjaldið hafi ekki verið ósanngjarnt miðað við hvað önnur flugfélög krefjast fyrir nafnabreytingar.