Þetta sýna niðurstöður nýs reiknilíkans sem var nýlega birt í vísindaritinu PNAS. Fram kemur að fyrstu 15 árin eftir samþykkt Parísarsáttmálans 2015 munu ein og sér valda því að yfirborð sjávar hækkar um 20 sentimetra.
Samkvæmt sáttmálunum ætla 196 ríki að draga úr losun CO2 til að reyna að halda hnattrænni hlýnun á milli 1,5 og 2 gráða. Bandaríkin hafa þó sagt sig frá sáttmálanum þar sem Donald Trump, forseti, trúir ekki á niðurstöður vísindarannsókna um hnattræna hlýnun.
The Guardian hefur eftir Peter Clark, loftslagsprófessor við Oregon ríkisháskólann, að yfirborð sjávar muni halda áfram að hækka næstu aldirnar. Mannkynið muni aðlaga sig að þessum nýja og dýra lífsstíl sem muni kosta okkur billjónir dollara.
Vísindamennirnir reiknuðu út hvaða áhrif það mun hafa ef aðildarríki sáttmálans fara eftir honum til 2030 og hætta síðan algjörlega að losa gróðurhúsalofttegundir. Samkvæt því sem Climate Action Tracker segir eru það aðeins tvö ríki sem eru nú á réttri leið til að uppfylla markmið sáttmálans. Það eru Marokkó og Gambía.