Það er óhollara en áður var talið að vera í mikilli yfirþyngd. Niðurstöður nýrrar rannsóknar sýna að fólk í mikilli yfirþyngd verður oftar krónískt veikt en fólk sem reykir daglega. Feita fólkið fær einnig fleiri króníska sjúkdóma samtímis.

Það var danska lýðheilsustofnunin sem gerði rannsóknina. Í umfjöllun Politiken um rannsóknina er haft eftir Stine Schramm, verkefnastjóra rannsóknarinnar, að reykingar og ótímabær dauðsföll tengist sterkum böndum en það hafi komið á óvart að sterkustu tengslin á þróun krónískra sjúkdóma hafi verið hjá fólki í mikilli ofþyngd.

Í rannsókninni var fylgst með  rúmlega 56.000 Dönum á aldrinum 45 til 67 ára frá 2010 til 2018. Fólkinu var skipt í eftirfarandi hópa: reykingafólk, mikil áfengisneysla, hreyfa sig lítið, óhollt mataræði og mikil yfirþyngd.

Eftir átta ár átti fólk í mikilli ofþyngd þrisvar sinnum frekar á hættu að fá sjúkdóma á borð við sykursýki 2, of háan blóðþrýsting, hjarta- og æðasjúkdóma og fleira en þeir sem ekki voru of þungir. Hjá reykingafólki voru líkurnar einu og hálfu sinni meiri eftir átta ár.