Laurel Griggs, ung og upprennandi leikkona, lést um helgina aðeins þrettán ára að aldri. Þrátt fyrir ungan aldur hafði Laurel komið fram á Broadway í sjö ár og kom hún meðal annars fram með stórleikkonunni Scarlett Johanson.
Í frétt USA Today kemur fram að banamein Laurel hafi verið astmakast sem leiddi til þrengsla í öndunarvegi hennar.
„Laurel var barn sem alla foreldra dreymir um að eiga. Hún var frábær stúlka, gat farið í öll hlutverk og gleymdi aldrei línunum sínum. Ég heyrði hana heldur aldrei kvarta,“ sagði afi hennar, David Rivlin.
Laurel lék meðal annars í Cat on a Hot Tin Roof og söngleiknum Once sem frumsýndur var árið 2013. Þá kom hún nokkrum sinnum fram í skemmtiþættinum Saturday Night Live. Sjúkralið var kallað að heimili hennar síðastliðinn þriðjudag en hún var úrskurðuð látin við komuna á sjúkrahús.
