Neri Ramires Chalo, 22 ára Bandaríkjamaður, varð fyrir bíl í Los Angeles á föstudagskvöld í síðustu viku.

Á myndbandi úr öryggismyndavélum við götuna má sjá þegar Neri hljóp þvert yfir götuna. Skyndilega komu tveir bílar á ofsahraða og ók annar þeirra á Neri á miklum hraða.

Þegar vegfarendur áttuðu sig á því sem gerst hafði voru lögregla og sjúkralið kölluð til, en Neri var úrskurðaður látinn á vettvangi.

Í frétt ABC News kemur fram að 35 bílar hafi ekið framhjá Neri, þar sem hann lá í blóði sínu á götunni, án þess að stoppa. Sumir hægðu á sér eða skiptu um akrein til að aka ekki yfir Neri þar sem hann lá í götunni, nokkuð frá staðnum þar sem slysið varð.

Lögregla telur að ökumennirnir tveir sem sjást á umræddu myndbandi hafi verið í kappakstri og verið á rúmlega 60 mílna hraða (96 kílómetrar á klukkustund) á svæði þar sem hámarkshraði er 40 mílur (64 kílómetrar á klukkustund). Báðir ökumennirnir óku af vettvangi án þess að stoppa. Lögregla telur sig vita hver ökumaðurinn er sem ók á Neri en hann er þó ekki í haldi lögreglu.