Lögreglan í Flórída í Bandaríkjunum hefur beðið Amazon netverslunina um upptökur úr Echo smart hátalara sem var í herbergi þar sem kona var myrt í sumar. Vonast er til að hátalarinn hafi tekið upp hljóð í herberginu og geti upptökurnar varpað ljósi á hver myrti konuna.

Konan, hin 32 ára Sylvia Galva Crespo, var stungin í bringuna með spjóti og lést af völdum stungunnar. The Guardian segir að þegar lögreglan kom á vettvang hafi Sylvia legið blæðandi á gólfinu en hjá henni var vinkona hennar sem reyndi að bjarga lífi hennar. Það tókst því miður ekki.

Adam Crespo, eiginmaður hennar, er grunaður um morðið. Vinkonan segist hafa heyrt hjónin rífast áður en Sylvia var myrt. Adam neitar sök og því vill lögreglan nú heyra hvað gekk á í aðdraganda morðsins.

Adam segir að Sylvia hafi látist fyrir slysni, ekki hafi verið um morð af yfirlögðu ráði að ræða. Við yfirheyrslur sagði hann að spjótið hefði brotnað fyrir mistök þegar þau hjónin rifust og að oddur þessi hefði fyrir algjöra tilviljun lent í bringu Sylvia. Hann segist hafa dregið oddinn út í þeirri von að aðeins væri um lítið sár að ræða en það reyndist vera afdrifarík ákvörðun. En af hverju spjótið var í íbúðinni hefur hann ekki útskýrt.