Á þriðjudag í síðustu viku var Amber Guyger, lögreglukona í Dallas í Texas, dæmd í tíu ára fangelsi fyrir að hafa skotið nágranna sinn, Botham Jean, til bana. Aðalvitnið í málinu var Joshua Brown, 28 ára, sem bjó í sama fjölbýlishúsi og Guyger og Jean. Á föstudaginn var hann skotinn til bana í Dallas.

Hann fannst helsærður á bílastæði í borginni og var strax fluttur á sjúkrahús. Læknum tókst ekki að bjarga lífi hans. Lögreglan veit ekki hver eða hverjir skutu hann.

Lögmaður fjölskyldu Botham Jean, Lee Merrit, sagði að fjölskyldan sé niðurbrotin vegna morðsins á Brown. Brown hafi verið aðalvitnið og fjölskyldan þarfnist hans til að fá svör í málinu. USA Today skýrir frá þessu.

Málið hófst í september á síðasta ári þegar Guyger skaut Jean til bana. Guyger var ekki í vinnu en var í einkennisfatnaði sínum. Hún sagðist hafa ruglast á íbúðum og óvart farið inn í íbúð Jean og hafi talið hann vera innbrotsþjóf og hafi því skotið hann. Hún var skömmu síðar rekin úr starfi hjá lögreglunni í Dallas.

Brown bar vitni fyrir dómi og sagðist hafa verið í byggingunni þegar Jean var myrtur. Hann sagðist hafa heyrt í þeim og hafi það hljómað eins og þau hafi orðið mjög hissa að rekast á hvort annað. Síðan heyrði hann skotum hleypt af.

Málið hefur vakið mikla athygli í Banaríkjunum enda enn eitt málið þar sem hvítur laganna vörður skýtur svarta manneskju til bana.