Þetta segir Marete Eggesbø hjá norsku lýðheilsustofnuninni. Hún stendur að baki nýrrar rannsóknar sem sýnir að hægt er, að stórum hluta, að spá fyrir um hvort nýburar verði of feitir síðar á ævinni með því að skoða hvaða bakteríur eru í þörmum þeirra.
Norska ríkisútvarpið skýrir frá þessu. Haft er eftir Marete að niðurstaðan sé spennandi og að ef hægt sé að breyta þarmaflórunni snemma á lífsskeiðinu sé hugsanlega hægt að koma í veg fyrir að fólk verði of feitt.
Ofþyngd meðal barna er vaxandi vandamál um allan heim. Vísindamenn vita að ástæður ofþyngdar eru samspil margra þátta, lífsstíls, slæmra matarvenja og of lítillar hreyfingar. Auk þess eiga erfðir sinn þátt í þessu.
Niðurstöður nýju rannsóknarinnar sýna að þarmaflóran hjá fólki í ofþyngd er öðruvísi en hjá grönnu fólki. Í tilraunum hafa grannar mýs bætt á sig þyngd eftir að hafa fengið þarmaflóru feitra músa eða frá feitu fólki.
Í rannsókn Merete og félaga var þarmaflóra 165 barna rannsökuðu frá því að þau voru fjögurra daga þar til þau voru tveggja ára. Þegar þau náðu tólf ára aldri var líkamsþyndgarstuðull þeirra síðan reiknaður út.
Niðurstöðurnar sýna að þarmaflóra barna, þegar þau voru 10 daga, útskýrði 20 prósent af líkamsþyngdarstuðli þeirra við 12 ára aldur. Við tveggja ára aldur voru enn sterkari tengsl á milli samsetningar þarmaflórunnar og líkamsþyngdarstuðulsins þegar börnin voru 12 ára.
