CNN skýrir frá þessu. Faðirinn átti hlut í fjárfestingafélagi og var vel efnum búinn. En í janúar 2015 fannst honum nóg komið og ákvað að hætta að láta þrítugan soninn fá vasapeninga. Thomas yngri lifði hátt, hafði lokið námi við hinn virta Princeton-háskóla en vann ekki.
Hann fékk sem nemur um 150.000 íslenskum krónum á viku í vasapeninga frá foreldrum sínum. Það virðist hafa orðið honum ofviða að sjá fram á að missa þennan fjárhagsstuðning og því skaut hann föður sinn til bana.
Í síðustu viku var hann dæmdur í 30 ára fangelsi fyrir morðið. Hann játaði að hafa orðið föður sínum að bana en þvertók fyrir að hafa skipulagt morðið. Lögmaður hans sagði hann hafa verið geðveikan á því augnabliki sem hann drap föður sinn og þann framburð studdi móðir hans og ekkja Thomas eldri. En kviðdómurinn keypti þessa skýringu ekki og því var hann sakfelldur og dæmdur í 30 ára fangelsi.
