Þegar söngvari Blink-182, Tom DeLonge, hætti í hljómsveitinni árið 2017 stofnaði hann hóp sem nefnist To the Stars Academy of Arts & Sciences en um rannsóknarhóp er að ræða sem ætlar að rannsaka hvort vitsmunaverur séu til utan jarðarinnar okkar.

Í nýlegu samtali við The New York Times var talsmaður hópsins spurður hvort hópurinn hefði aflað sannana um tilvist fljúgandi furðuhluta.  Svarið var: „Vissulega“. ScienceAlert skýrir frá þessu.

Ekki liggur þó ljóst fyrir hvaða gögn eða sannanir hópurinn hefur komist yfir eða hvort þau tengist á einhvern hátt þremur myndbandsupptökum af „óþekktum loftförum“ sem eiga rætur að rekja til bandaríska flughersins. Talsmenn hersins hafa nýlega staðfest að upptökurnar séu ófalsaðar.

Talsmaður hópsins sagði að hópurinn hafi verið að reyna að finna hæfustu einstaklinga heims til að sinna vísindarannsóknum og greiningum fyrir hópinn. Ekki eigi að hrapa að ályktunum, gögnin eigi að ráða og skera úr um hvað eitthvað er og hvað það er ekki.