Starfsmaður bandaríska lággjaldaflugfélagsins JetBlue gæti átt tuttugu ára fangelsisdóm yfir höfði sér eftir að upp komst að hún hafði látið vinum og vandamönnum í té betri sæti í vélum félagsins.
Starfsmaðurinn, Tiffany Jenkins, notaði sérstakan kóða í bókunarvél félagsins sem á að gera starfsmönnum kleift að fá betri sæti en þessi hefðbundnu án þess að greiða aukalega fyrir. Kóðann á helst ekki að nota nema í neyðartilvikum, til dæmis þegar dauðsföll verða eða þegar fólk missir af flugi.
Saksóknarar telja að Tiffany hafi í að minnsta kosti 500 skipti gert þetta fyrir vini og vandamenn áður en upp um hana komst. Tiffany var handtekin í nóvember í fyrra en grunur leikur á að hún hafi stundað þetta markvisst á tímabilinu frá júlí 2016 og fram til september 2017.
Telja saksóknarar að um hafi verið að ræða 505 flugmiða fyrir rúmlega hundrað manns. Þessi gjörningur Tiffany hafi í raun kostað flugfélagið 785 þúsund Bandaríkjadali, um hundrað milljónir króna.
Að því er fram kemur í frétt Boston Globe hefur Tiffany þegar játað sök í málinu en dómur mun falla í janúar. Í frétt blaðsins kemur fram að hámarksrefsing fyrir brot af þessu tagi sé 20 ár í fangelsi. Þá eru taldar líkur á að henni verði gert að greiða JetBleu allt að eina og hálfa milljón dala í bætur.