Lögreglan á Bretlandseyjum stendur frammi fyrir einni stærstu morðrannsókn í sögu landsins eftir að 39 fundust látnir í flutningabíl í Essex í morgun. Bílstjórinn, 25 ára Norður-Íri, hefur verið handtekinn vegna gruns um manndráp.

Mikið er fjallað um málið í breskum fjölmiðlum í dag. Ekki hefur verið greint frá þjóðerni þeirra sem létust en allt bendir til þess að um hafi verið að ræða flóttamenn í leit að betra lífi. Allir sem létust voru fullorðnir fyrir utan einn einstakling sem var á unglingsaldri.

Talið er að bifreiðin, sem er af gerðinni Scania, hafi komið til Englands frá hafnarbænum Holyhead í Wales um liðna helgi. Rannsókn lögreglu nú beinist að því að kortleggja ferðir flutningabílsins síðustu daga. Ferjur frá Írlandi koma gjarnan við í Holyhead og þykir ekki loku fyrir það skotið að flutningabíllinn, sem er skráður í Búlgaríu, hafi farið í ferju frá Frakklandi til Írlands, þaðan til Wales og loks til Englands.

Landamæravarsla hefur verið hert talsvert á svæðum við Ermarsundsgöngin og telur lögregla að þeir sem stunda smygl á fólki telji það hættuminna að fara Írlandsleiðina svokölluðu – eins og umræddur flutningabíll fór mögulega. Þetta er löng leið sem getur tekið langan tíma.

Í fréttum breskra fjölmiðla kemur fram að kælir sé í gámnum en ekki liggur fyrir hvort hann hafi verið í gangi. Talið er að fólkið hafi verið í gámnum í að minnsta kosti fjóra daga. Bent hefur verið á það að ekkert klósett hafi verið í gámnum og loftgæði fljótt orðið lítil sem engin.