Lík 39 einstaklinga fundust í flutningabíl í Essex á Suðaustur-Englandi í morgun. Bílstjóri flutningabílsins, 24 ára karlmaður frá Norður-Írlandi, hefur verið handtekinn vegna málsins en rannsókn er á frumstigi.
Frá þessu greina breskir fjölmiðlar.
Í frétt Mail Online kemur fram að bíllinn sé frá Búlgaríu og hafi komið til Englands frá Holyhead í Wales síðastliðinn laugardag. Ekki kemur fram hvaðan fólkið er sem fannst látið, þó telja megi líklegt að um hafi verið að ræða flóttafólk í leit að betra lífi á Bretlandseyjum.
„Þetta er mikill harmleikur þar sem margir eru látnir. Rannsókn okkar nú mun beinast að því hvað gerðist. Vinna við að bera kennsl á hin látnu stendur nú yfir en það gæti þó tekið langan tíma,“ segir Andrew Mariner, yfirlögregluþjónn hjá lögreglunni í Essex, í samtali við Sky News.