Lonely Planet, umfangsmesti útgefandi ferðabóka í heiminum, hefur útnefnt þá staði sem ferðamenn ættu að leggja áherslu á að heimsækja á næsta ári. Hér er um að ræða nokkra flokka; lönd, borgir, héröð og staði þar sem hægt er að fá mikið fyrir peninginn.
Það er skemmst frá því að segja að lítið landlukt land í austurenda Himalajafjalla trónir á toppnum í sínum flokki, en það er konungsríkið Bútan sem er margrómað fyrir einstaka náttúrufegurð. Íbúar í Bútan eru 740 þúsund og þar má finna glæsileg hof og fallegar byggingar innan um Himalajafjöllin. Ferðamannaiðnaðurinn hefur farið vaxandi í Bútan á undanförnum árum en hver ferðamaður þarf að greiða upphæð sem nemur tæpum 30 þúsund krónum fyrir að heimsækja landið.
Á eftir Bútan í flokki eftirsóknarverðra landa er England og er það einkum vegna fjölbreytileika landsins sem það skorar hátt. Þar á eftir koma Norður-Makedónía, Arúba, eSwatini (áður Swaziland), Kosta Ríka, Holland, Líbería, Marokkó og Úrúgvæ.
Salzburg í Austurríki er efst í flokki borga en þar á eftir koma Washington (BNA), Kaíró (Egyptaland), Galway (Írland), Bonn (Þýskaland), La Paz (Bólivía), Kochi (Indlandi), Vancouver (Kanada), Dúbaí (Sameinuðu arabísku furstadæmin) og Denver (Bandaríkin).
Í flokki staða þar sem hægt er að fá mest fyrir peninginn er héraðið Austur-Nusa Tenggara í Indónesíu. Héraðið samanstendur af yfir 500 eyjum en stærstar þeirra eru Sumba, Flores og vesturhluti Tímor. Þó að héraðið sé vanþróað er mikið að sjá fyrir ferðamenn og áhersla hefur verið á að byggja upp ferðamannaiðnaðinn. Í héraðinu er til dæmis eyjan Komodo en þar eru heimkynni Komódódrekans, stærstu eðlutegundar heims.
Þar á eftir komu Búdapest, höfuðborg Ungverjalands, Madhya Pradesh-hérað í Indlandi og Buffalo í Bandaríkjunum.
