Brúnbirnir eru alfriðaðir í Noregi enda taldir í útrýmingarhættu. En í síðustu viku bárust góðar fréttir af viðkomu stofnsins. Vöktun og rannsóknir leiddu í ljós að á síðasta ári voru fleiri birnir og húnar í landinu en nokkru sinni undanfarin tíu ár.

Samkvæmt fréttum norskra fjölmiðla var vitað um 138 birni í landinu á síðasta ári. 63 kvendýr og 75 karldýr. Þetta er 13 dýrum fleira en 2017 og um leið mesti fjöldi sem vitað er um síðan 2009 en þá hófst vöktun á bjarnarstofninum.

Frá 2009 hafa vísindamenn rannsakað saur bjarna og hár af þeim til að kortleggja stærð stofnins, mat á stofnstærðinni er byggt á þessum rannsóknum.