Vinna við flutning þúsund tonna vita í norðvesturhluta Danmerkur hófst í morgun. Vitinn sem um ræðir er 23 metrar á hæð og stendur hann við strendur Norðursjávar.
Þegar hann var reistur árið 1900 stóð hann um 200 metra frá strandlengjunni en vegna ágangs sjávar á undanförnum árum og áratugum var talin veruleg hætta á að sjórinn myndi gleypa hann á næstu árum. Áður en að vinna við flutninginn hófst í morgun voru innan við tíu metrar að bjargbrún eins og sést á meðfylgjandi myndbandi.
Það er ekki beint létt verk að flytja svo stóran vita og því krafðist verkið mikils undirbúnings. Bæjarstjórinn Arne Boelt, bæjarstjóri í Hjørring Kommune, segir að framkvæmdin hafi verið áhættunnar virði. Ef ekki hefði verið ráðist í flutninginn hefði þurft að rífa vitann og það hugnaðist fáum.
Lea Wermelin, umhverfisráðherra Danmerkur, segir við danska fjölmiðla að vitinn sé „þjóðargersemi“ og þess vegna hafi verið réttlætanlegt að verja sem nemur 100 milljónum króna í flutninginn.
Vitinn var tekinn úr notkun árið 1968 og breytt í safn. Talið er að um 250 þúsund ferðamenn heimsæki vitann á hverju ári.