Þegar hin sjö ára gamla Olivia Grant lést árið 2017 töldu nær allir að stúlkan hefði látist vegna alvarlegra veikinda. Áður en hún lést hafði móðir hennar, Kelly Renee Turner, tjáð sig opinskátt um veikindi stúlkunnar og þá staðreynd að hún væri dauðvona.

Turner sagði að dóttir hennar væri með einhverfu og þjáðist auk þess af alvarlegum sjúkdómi (e. neurogastrointestinal encephalomyopathy) sem leggst á líffæri líkamans. Turner hafði þáð fjárhagsaðstoð frá hjálparsamtökum, meðal annars 11 þúsund dali frá samtökunum Make-a-Wish Foundation.

Nú leikur grunur á að þetta hafi allt verið uppspuni frá rótum og Olivia hafi hreint ekki verið alvarlega veik. Kelly var handtekin í síðustu viku og henni birt ákæra í 13 liðum, meðal annars fyrir morð af fyrstu gráðu og slæma meðferð á barni.

Nokkrum vikum áður en Olivia lést hafði Kelly óskað eftir því að fá að hafa stúlkuna heima, fjarri læknum og heilbrigðisstarfsfólki. Lífsgæði hennar væru orðin svo lítil að best væri ef hún fengi að vera heima í friði og ró.

Það var svo í nóvember 2018 að lík Oliviu var grafið upp og leiddi rannsókn í ljós að hún þjáðist ekki af neinum banvænum sjúkdómi. Þetta var gert eftir að grunsemdir vöknuðu um að ekki væri allt með felldu. Fyrr þetta ár hafði Kelly farið með aðra dóttur sína til læknis vegna mikilla beinverkja.

Sagði Kelly að stúlkan hefði áður fengið meðferð vegna krabbameins en læknar komust að því að það var uppspuni. Stúlkan hefði aldrei greinst með krabbamein, hvað þá gengist undir krabbameinsmeðferð. Þá lýsti stúlkan þessum beinverkjum aðeins þegar móðir hennar var með henni.

Kelly á lífstíðarfangelsi yfir höfði sér verði hún fundin sek.