Trump hefur harðneitað að hafa fryst fjárstuðning til Úkraínu til að þrýsta á úkraínsku ríkisstjórnina að rannsaka og reyna að grafa upp eitthvað misjafnt um helsta pólitíska andstæðing hans, Joe Biden. En á fimmtudaginn kom Mick Mulvaney, starfandi starfsmannastjóri Hvíta hússins, fram á fréttamannafundi og gerði stórt gat á þessa málsvörn Trump. Hann sagði þá að ein af ástæðunum fyrir að fjárveiting upp á 391 milljón dollara hafi ekki verið greidd til Úkraínu á tilsettum tíma hafi verið vegna kröfu Trump um að þarlend stjórnvöld rannsaki forsetakosningarnar 2016 í Bandaríkjunum og reyni að grafa eitthvað misjafnt upp um demókrata.
„Sagði hann mér að áhyggjurnar af spillingu væru tengdar netþjóni miðstjórnar demókrataflokksins? Algjörlega. Enginn vafi á því. Af þeim sökum greiddum við ekki fjárhæðina.“
Sagði Mulvaney og vísaði þarna til kenningar um að árás tölvuþrjóta á tölvur demókrata í kosningabaráttunni hafi verið sviðsett og hafi tengst Úkraínu en Rússum hafi verið kennt um hana og hafi árásin verið upphafið að 18 mánaða langri rannsókn á tengslum Trump við Rússa.
Það hvort Trump hafi dregið að greiða peningana til Úkraínu til að styrkja sjálfan sig pólitískt er aðalpunkturinn í þeirri forrannsókn sem fulltrúadeildin hefur sett af stað á meintri misnotkun valds og embættisafglöpum Trump. Játning Mulvaney gerir ekkert annað en þrengja netið um Trump. Viðbröðin við orðum hans létu enda ekki á sér standa. Lögmenn Trump vísuðu orðum Mulvaney á bug. Dyggasti stuðningsmaður Trump, sjónvarpsmaðurinn Sean Hannity sagði Mulvaney vera „heimskan“. Demókratar sögðu þetta vera játningu og margir repúblikanar, sem hafa hingað til hafa varið gjörðir Trump, lýstu yfir áhyggjum sínum af málinu. Lisa Murkowski, þingmaður repúblikana frá Alaska, sagði að ekki væri hægt að draga greiðslur fjárstyrkja sem samþykktir hafi verið til að ná fram pólitískum markmiðum.
Það kom ekki að miklu gagni að Mulvaney reyndi síðan að draga orð sín til baka.
Þá gagnrýndu margir á hægri vængnum ákvörðun Trump um að halda næsta G7 fund á golfhóteli sínu í Flórída. Í leiðara hins íhaldssama dagblaðs Washington Examiner var skrifað að þessi ákvörðun Trump gerði enn erfiðara að verkum að trúa „að ósæmileg krafa Trump á hendur Úkraínumönnum“ hafi snúist um baráttu gegn spillingu. Trump tilkynnti síðan á Twitter um helgina að hann væri hættur við að halda fundinn á hóteli sínu og kenndi demókrötum aðallega um að hann neyddist til að taka þessa ákvörðun.
Það vakti síðan mikla athygli á föstudaginn þegar Washington Post birti grein eftir Mitch McConell, leiðtoga repúblikana í öldungadeildinni, þar sem hann gagnrýndi Trump harðlega fyrir ákvarðanir hans varðandi innrás Tyrkja í Sýrland. Hann sagði ákvörðunina vega að öryggi Bandaríkjanna. McConnell bað félaga sína í öldungadeildinni einnig um að undirbúa sig undir að réttað verði yfir Trump fljótlega þar sem þess verði krafist að hann verði sviptur embætti. Eins og staðan er núna er þó ólíklegt að öldungadeildin muni samþykkja að Trump verði sviptur embætti en til þess að svo verði þurfa 20 repúblikanar í deildinni að ganga til liðs við demókrata og samþykkja það. En Trump er í miklum ólgusjó þessa dagana og ekki óhugsandi að fleiri mál komi upp á yfirborðið eða að fleiri stígi fram og skýri frá atriðum sem geta komið forsetanum illa. Brestir virðast vera komnir í varnir stuðningsmanna hans.
Samkvæmt nýrri skoðanakönnun Gallup, sem var gerð áður en Mulvaney kom fram á fréttamannafundinum, styðja 52 prósent Bandaríkjamanna að Trump verði settur af. Til samanburðar má nefna að þegar Richard Nixon sagði af sér 1974 studdu 58 prósent landsmanna að honum yrði vikið úr embætti.