Yfir 330 barnaníðingar víðsvegar að úr heiminum hafa verið handteknir í alþjóðlegri lögregluaðgerð. Aðgerðin kemur í kjölfar sakfellingar yfir breska barnaníðingnum Matthew Falder sem er talinn vera einn versti barnaníðingurinn í sögu Bretland. Hann afplánar nú 25 ára dóm fyrir margvísleg kynferðisbrot gegn börnum. Aðferðir og athæfi Falders komu lögreglunni á sporið varðandi gífurlega umfangsmikil og samantekin brot barnaníðinga á hinum svokallaða djúpvef internetsins – dark web.
Djúpvefurinn er sá hluti veraldarvefsins sem er óaðgengilegur leitarvélum og enginn rekst á fyrir tilviljun í vefskoðun. Djúpvefurinn er ósýnilegi vefurinn undir þeim sýnilega og fjölþætta veraldarvef sem við flest notum daglega. Barnaníðingarnir sem afhjúpaðir voru í þessari aðgerð lögreglunnar áttu það allir samseiginlegt að vera tengdir við vefsíðuna Welcome to the Video. Þar höfðu þeir aðgang að yfir 250.000 svívirðilegum myndskeiðum af barnaníði. Þeir greiða fyrir hroðann ýmist með bitcoin eða vinna sér inn aðgang með því að dreifa eigin barnaníðsefni.
Rannsóknin leiddi í ljós að stjórnandi síðunnar er 23 ára gamall maður í S-Kóreu, Jong Woo Son að nafni, og hefur hann verið handtekinn. Auk hans voru barnaníðingar í Bandaríkjunum, Þýskalandi, Spáni, Sádí Arabíu, Sameinuðu arabísku furstadæmunum, Tékklandi og Kanada handteknir.
Meðal efnisins sem fannst á síðunni voru myndskeið sem sýndu misnotkun á nýfæddum börnum.
Stjórnandi lögreglurannsóknarinnar, Nikki Holland, segir: „Níðingar á djúpvefnum – sem margir hverjir eru verstu barnaníðingarnir sem fyrirfinnast – geta ekki lengur falið sig fyrir lögreglunni. Þeir eru ekki eins öruggir og þeir töldu sig vera.“