Hjónin Eileen og David Connors lentu í heldur leiðinlegri lífsreynslu þegar þau heimsóttu Kanada fyrir skemmstu. Hjónin, ásamt ungu barni sínu, eru frá Bretlandi en voru stödd í Kanada til að heimsækja ættingja sem eru búsettir í Vancouver í Bresku Kólumbíu.
Þann 3. október síðastliðinn var fjölskyldan á rúntinum. Eileen, David og barn þeirra voru í bifreiðinni en undir stýri sat frændi þeirra, Michael. Þegar dýr hljóp skyndilega í veg fyrir bifreiðina beygði Michael inn á ómerktan veg en ekki leið á löngu þar til lögreglubílar og bílar merktir bandaríska landamæraeftirlitinu höfðu umkringt bifreiðina. Það var þá sem í ljós kom að bíllinn var kominn inn fyrir landamærin til Bandaríkjanna en fjölskyldan hafði ekki leyfi til að ferðast þangað.
„Þau höfðu ekki hugmynd um að þau væru komin inn í Bandaríkin. Þau voru bara að reyna að komast aftur á hótelið,“ segir Bridget Cambria, lögmaður fjölskyldunnar.
Fjölskyldan spurði landamæraverðina hvort þau mættu ekki bara snúa við, en fengu þvert nei. „Við endurtókum í sífellu að við hefðum gert mistök en við vorum handtekin engu að síður,“ segir Eileen í yfirlýsingu til Pittsburgh Post-Gazette. Þau voru flutt í húsakynni landamæraeftirlitsins nærri landamærunum og segir Eileen að þar hafi hún þurft að sofa á skítugu gólfinu ásamt þriggja mánaða dóttur sinni.
Tveimur dögum síðar, þann 5. október, var fjölskyldan flutt í varðhaldsvist fyrir til Leesport í Pennsylvaníu þar sem fjölskyldan dvelur enn í fangelsi fyrir þá sem eru ólöglegir í landinu. Eileen segir að eitthvað þessu líkt myndi aldrei gerast í Bretlandi. Bretar myndu ekki koma fram við Bandaríkjamenn með þessum hætti. „Það, hvernig bandarísk yfirvöld hafa komið fram við okkur, er eitthvað sem við munum aldrei gleyma.“
Lögmaður fjölskyldunnar, Bridget Cambria, segir að líklega muni málið enda þannig að fjölskyldunni verði vísað frá Bandaríkjunum. Bridget segist þó ekkert vita hvenær það verður og óvíst sé hvaða forsendur liggja að baki því að fjölskyldunni sé haldið í fangelsi.