Scott Galloway, prófessor í markaðsfræði við NYU Stern School of Business, segir í bloggfærslu að erfiðir tímar séu framundan hjá Tesla bílaframleiðandanum. Hann segir að markaðsvirði fyrirtækisins muni lækka um 80 prósent eða jafnvel þurrkast alveg út á næstu 10 árum. Ástæðan er að hans sögn að fyrirtækið er ekki nægilega stórt til að keppa á markaði.
Í grein sinni fjallar hann um nokkur nýsköpunarfyrirtæki sem eru nú metin á meira en einn milljarð dollara og segir verðmæti þeirra ofmetið. Meðal þessara fyrirtækja er Tesla.
Galloway var á lista yfir 50 bestu viðskiptafræðirprófessora heimsins árið 2012. Hann spáði fyrir um kaup Amazon á Whole Foods keðjunni löngu áður en viðskiptin fóru fram sumarið 2017. Hann er ekki einn um að spá fyrir um erfiða tíma hjá Tesla en slíkum spám er yfirleitt mætt með harðri gagnrýni frá fólki sem hefur mikla trú á Elon Musk og Tesla.
Galloway segir í grein sinni að Tesla hafi breytt heiminum til hins betra og að Elon Musk sé snillingur en Tesla sé einfaldlega ekki nægilega stórt fyrirtæki til að geta keppt á hörðum markaði.