Breski stórbankinn HSBC ætlar að fækka verulega í starfsliði sínu en 10.000 stöður verða lagðar niður hjá bankanum. Þetta svarar til fjögurra prósenta fækkunar starfsmanna. Í fyrstu verða það launahæstu starfsmennirnir sem verða fyrir barðinu á niðurskurðinum.
Financial Times skýrir frá þessu. Blaðið hefur eftir heimildarmanni að innan bankans hafi verið vitað árum saman að lækka þyrfti rekstrarkostnaðinn sem er að stórum hluta launakostnaður. Nú verði byrjað að gera eitthvað í því.
Talsmenn bankans hafa ekki viljað tjá sig um málið.
HSBC er sjöundi stærsti banki heims og er hann með útibú víða um heim. Í lok júní voru 237.685 starfsmenn hjá bankanum.
Heimildarmaður Financial Times sagði að væntanlega verði tilkynnt um niðurskurðinn síðar í mánuðinum.
