Richard Huckle, sem oft hefur verið sagður hryllilegasti barnaníðingur Bretlands, var stunginn til bana í fangaklefa sínum í gær í fangelsi nálægt York í Bretlandi, en fangelsið hýsir marga af alræmdustu glæpumönnum Bretlands. Frá þessu er sagt á vef Daily Mail. Fangi dúsir nú í einangrun, grunaður um morðið á Huckle.
Huckle var dæmdur í að lágmarki 25 ára fangelsi árið 2016 fyrir 191 kynferðisbrot gegn börnum. Yngsti brotaþolinn var sex mánaða gamall.
Aðferðir Huckle til að ginna til sín ung börn vöktu mikinn óhug en hann dulbjó sig sem kristinn mann og kom sér í góðar stöður á fósturheimilum og munaðarleysingjahælum í Malasíu og Kambódíu þar sem hann kenndi ensku og ljósmyndun. Nýtti hann sér neyð barna og fjölskyldna þeirra í fátækum hverfum til að komast inn á gafl hjá þeim og misnota börnin ítrekað. Huckle gortaði sig síðan af ofbeldinu sem hann beitti börnin í hræðilegum bloggfærslum. Í bloggfærslunum gaf hann sér barnaníðsstig (e. PedoPoints) fyrir árásirnar. Þá tók hann einnig upp sjálfan sig er hann nauðgaði börnum. Þegar hann var loks handtekinn hafði hann safnaði yfir tuttugu þúsund myndum af barnaníð sínum en hann seldi myndirnar í hagnaðarskyni.
Upp komst um brot Huckle þegar að ástralska lögreglan komst á snoðir um net barnaníðinga á myrka vefnum (e. Dark web) árið 2014. Huckle var síðan handtekinn um jólin 2015 þegar hann kom til Bretlands í frí yfir jólin. Huckle hélt fram sakleysi sínu en játaði síðar brotin fyrir foreldrum sínum. Foreldrarnir sögðu til hans og grátbáðu lögregluna um að koma syni sínum bak við lás og slá.
Huckle játaði 71 brot fyrir dómi, en brotin áttu sér stað yfir átta ára tímabil. Þegar dómurinn féll öskraði aðstandandi einnar fjölskyldunnar: „Þúsundir dauðdaga er of gott fyrir þig. Ég þekki eina af fjölskyldunum. Þær skipta þig engu máli.“
Dómarinn Peter Rook var ómyrkur í máli þegar hann dæmdi Hucke í fangelsi.
„Þú sigtaðir út og þjálfaðir upp fátæk börn og fjölskyldur þeirra í fátæku samfélagi og vildir án efa ganga í augun á ættingjum barnanna með auði þínum sem Vesturlandabúi. Þessi samfélög voru sérstaklega ginkeypt vegna fátæktar. Brot þín urðu fastur sess í tilverunni. Lífið þitt snerist um að misnota börn,“ sagði hann og hélt áfram.
„Brengluð trú þín er rótgróin og er sjálfsblekkingu þinni engin takmörk sett. Þú varst og ert með börn á heilanum á kynferðislegan hátt. Það er ljóst út frá færslum þínum á földum, dulkóðuðum barnaníðingavefsíðum á myrka vefnum og út frá handbókinni sem þú varst með í smíðum að lífið þitt snerist um þráhyggju þína um þína eigin kynferðislegu losun með því að misnota börn. Það er líka ljóst að þú hefðir haldið uppteknum hætti ef þú hefðir ekki verið handtekinn.“
Dómarinn bætti við að handbókin sem Huckle hafi verið með í smíðum hafi verið sextíu blaðsíðna löng og væru leiðbeiningar um hvernig aðrir gætu komist upp með að misnota börn. Kallaði dómarinn það „virkilega djöfullegt skjal.“ Huckle færði dómaranum stutta orðsendingu áður en hann var dæmdur og sagðist honum bjóða við heðgun sinni. Þá sagði dómarinn: „Það má vel vera að þú sjáir eftir þessu en það er engin raunveruleg eftirsjá.“