Dómari í Yala í suðurhluta Taílands skaut sig nýlega í bringuna fyrir framan fullsetinn réttarsal. Þetta gerði hann í mótmælaskyni við pólitískan þrýsting á dómstóla í landinu.

Bangkok Post skýrir frá þessu. Fram kemur að dómarinn hafi verið nýbúinn að kveða upp dóm í máli þar sem fimm menn voru ákærðir fyrir morð. Hann taldi sig vera undir miklum þrýstingi um að sakfella mennina og dæma til dauða. En hann sýknaði þá vegna skorts á sönnunargögnum.

Rétt fyrir sjálfsvígstilraunina birti dómarinn 25 síðna langt skjal á Facebook þar sem hann skrifaði að yfirmenn hans við dómstólinn hafi skipað honum að sakfella mennina. Það hefði þýtt dauðadóm yfir þremur þeirra en fangelsisdóm fyrir tvo þeirra. Hann skrifaði einnig að svona væri þrýst á alla dómara landsins.

Málið hefur vakið upp miklar áhyggjur um að æðstu dómarar landsins misnoti stöðu sína til að þrýsta á ákveðnar dómsniðurstöður sem falla vel að ákveðnum pólitískum markmiðum. Þessu vísa talsmenn dómstóla landsins á bug.
Dómarinn er á sjúkrahúsi og er ekki lengur í lífshættu.