Þetta sagði Michael McGlockton, faðir 28 ára karlmanns, Markeis McGlockton, sem var skotinn til bana á bílastæði í Flórída sumarið 2018. Byssumaðurinn, Michael Drejka, var dæmdur í tuttugu ára fangelsi vegna málsins sem vakti mikla athygli.
Drejka og Markeis lentu í orðaskaki fyrir utan verslun í Flórída þann 19. júlí í fyrra sem endaði þannig að Drejka dró upp skotvopn og skaut Markeis til bana. Sjálfur var Markeis óvopnaður og voru tvö börn hans í bílnum þegar hann lést.
Í fyrstu taldi lögregla ekki ástæðu til að gefa út ákæru á hendur Drejka vegna svokallaðra „Stand Your Ground“-laga sem eru í gildi í Flórída. Samkvæmt þeim mega menn verja sínar eignir með öllum tiltækum ráðum.
Reiði braust út í kjölfarið og fór að lokum svo að Drejka var ákærður fyrir manndráp. Verjendur hans fóru fram á að hann fengi skilorðsbundinn dóm en dómari hlustaði ekki á það. Dómari sagði raunar að Drejka liti á sig sem sjálfskipaðan lögreglumann sem átti það til að lenda í orðaskaki við ökumenn sem lögðu í stæði fyrir hreyfihamlaða. Hann fylgdist með stæðinu og sá til þess að allir færu að lögum og reglum.
