Síðdegis þann 2. nóvember 2015 var hinn níu ára Tyshawn Lee að leik í garði í Chicago. Hann var nýkominn út eftir að hafa sagt ömmu sinni að hann ætlaði út með körfuboltann sinn. Hann var nýkominn heim úr skóla og var enn í skólabúningi sínum. Maður kom að máli við Tyshawn og spilaði körfubolta við hann í smástund. Hann fékk Tyshawn síðan til að koma með sér inn í húsasund þar sem Tyshawn var skotinn í höfuðið af stuttu færi.
Litli drengurinn var skilinn eftir á malbikinu en morðinginn og samverkamenn hans flúðu af vettvangi í bíl.
„Jafnvel á tímum sem þessum, þar sem við erum næstum því orðin ónæm fyrir fréttum um ofbeldisverk hefur þetta mál níst okkur inn að beini,“ sagði Kim Foxx, saksóknari, í yfirlýsingu að sögn CNN. Saksóknarar sögðu morðið hafa verið „skipulagða aftöku“.
Lögreglan gafst ekki upp við rannsókn málsins og handtók að lokum tvo menn, þá Dwright Boone-Doty, 25 ára, og Morgan, 31 árs. Þeir hafa nú verið fundnir sekir um þetta hrottalega morð.
Fyrir dómi sagði saksóknari að Tyshawn hafi treyst manninum sem hafi notfært sér sakleysi níu ára barns til að lokka drenginn út úr garðinum. Meðal þeirra gagna sem kviðdómurinn fékk að sjá var ljósmynd af þumalfingri Tyshawn. Á myndinni mátti sjá skotáverka á fingrinum en hann var tilkominn eftir að Tyshawn lyfti höndum til að verjast árásinni.
Mál Doty og Morgan voru meðhöndluð af sitthvorum kviðdómnum. Þeir reyndu báðir að varpa sökinni á hinn en voru báðir sakfelldir fyrir morðið.
Ástæðan fyrir morðinu var að faðir Tyshawn var meðlimur í glæpagengi sem átti í útistöðum við glæpagengi þeirra Doty og Morgan. Þeir grunuðu föðurinn um að hafa staðið að baki morði á bróður Morgan. Þeir ákváðu því að myrða níu ára son hans í hefndarskyni.
Dómari á enn eftir að kveða upp refsingu þeirra en búist er við að hún verði mjög þung, áratuga langt fangelsi. Þriðji maðurinn, Kevin Edwards, hefur nú þegar verið dæmdur í 25 ára fangelsi vegna málsins en hann ók flóttabílnum. Hann samdi um vægari refsingu gegn því að játa sök í málinu segir CNN.