Niðurstöður nýrrar rannsóknar sýna að tepokar gefa frá sér milljarða af örsmáum plastögnum sem fara inn í líkamann. Rannsókn vísindamanna við McGill háskólann í Kanada sýnir að þegar tepokar eru settir í sjóðandi vatn, 95 gráðu heitt, losna um 11,6 milljarðar örsmárra plastagna úr þeim.

Þetta er mun meira magn en vísindamenn töldu áður að væru í tepokum segir The Guardian. Samkvæmt niðurstöðum annarra rannsókna borðar meðalmanneskjan að minnsta kosti 50.000 örsmáar agnir af plasti árlega og andar álíka miklu magni að sér.

Niðurstöður rannsóknarinnar hafa verið birtar í tímaritinu Environmental Science and Technology. Fjórar tegundir tepoka voru rannsakaðar en pokarnir voru allir gerðir úr efnum sem innihalda plast.

Þeir voru opnaðir, þvegnir og síðan dýft í sjóðandi vatn þar sem þeir voru í fimm mínútur áður en þeir voru rannsakaðir ofan í kjölinn.