Púertó Ríkó er lítil eyjaþyrping í Karabískahafinu. Eyjarnar eru bandarískt yfirráðasvæði, ekki þó ríki í Bandaríkjunum, og íbúarnir bandarískir ríkisborgarar. Árum saman hafa íbúar eyjanna barist við efnahagsvanda og miklar skuldir. Þetta endaði með því að þetta þriggja milljóna manna land varð gjaldþrota fyrir þremur árum. En nú er loksins komin áætlun um hvernig á að koma landinu út úr viðjum gjaldþrotsins.

CNN skýrir frá þessu. Samkvæmt áætluninni, sem hefur verið samþykkt, verða 60 prósent af skuldum landsins felldar niður. Auk skuldaniðurfellinga og skuldbreytingar verður ellilífeyrir flestra íbúa eyjanna skorinn niður. Þetta þarf alríkisdómari þó að leggja blessun sína yfir.

Mikið atvinnuleysi er á eyjunum og íbúar hafa flutt á brott í stórum stíl og um leið hafa skatttekjur dregist mikið saman.

Þegar Púertó Ríkó fór fram á gjaldþrot í maí 2007 var það í fyrsta sinn sem bandarískt ríki eða yfirráðasvæði gerði slíkt. Á þeim tíma námu skuldirnar 73 milljörðum dala og sagði ríkisstjóri eyjanna að þær væru „ógreiðanlegar“.

Bandaríkjaþing reyndi af fremsta mætti að koma í veg fyrir að eyjarnar yrðu gjaldþrota. Lög, svonefnd PROMESA-lög, voru sett sem fela meðal annars í sér að allar greiðslur til kröfuhafa og kröfur þeirra skyldu frystar til 1. maí 2017. Á þessum tíma áttu stjórnvöld á Púertó Ríkó að leggja fram umfangsmikla aðgerðaáætlun um hvernig ætti að endurreisa efnahag eyjanna.

En þessi áætlun var aldrei samþykkt og þegar 1. maí 2017 rann upp neitaði þingið að framlengja lögin um eitt ár. Það hafði þær afleiðingar að Púertó Ríkó lýsti sig gjaldþrota.