IKEA er stærsti húsgagnaframleiðandi heims og þekkt um allan heim. Nú ætlar fyrirtækið að láta að sér kveða hvað varðar notkun umhverfisvænnar orku. Fyrirtækið er að ganga frá kaupum á hlutabréfum í sjö vindmyllugörðum (það eru stór svæði með fjölda vindmylla) í Rúmeníu fyrir sem svarar til um 20 milljarða íslenskra króna. Tilgangurinn er að IKEA verði sjálft sér nægt um umhverfisvænt rafmagn.
Það er danska vindmyllufyrirtækið Vestas sem á vindmyllugarðana. IKEA hyggst kaupa 80% hlut í þeim. Bloomberg skýrir frá þessu. Rafmagnsframleiðslan í þessum vindmyllugörðum er um 171 mw en það svarar til rafmagnsnotkunar 65 IKEA-verslana.
Fyrr á árinu keypti IKEA hlut í þýska vindmyllufyrirtækinu Veja Mate og á nú 900.000 sólarsellur í 14 löndum.
