„Ég er mjög heppinn,“ segir Stu MacDonald, Bandaríkjamaður í Oregon-ríki, sem vann 4,6 milljónir Bandaríkjadala í lottóinu á dögunum. Stu þessi hefur tvisvar fengið krabbamein en í bæði skiptin haft betur.
Í frétt ABC News kemur fram að MacDonald hafi keypt vinningsmiðann á kaffihúsi í bænum Bend í Oregon þann 7. September. Eiginkona hans, Claudia, hefur vanalega séð um miðakaupinn en í þetta skiptið sá hann um það þar sem hún gleymdi að kaupa miða.
Stu ákvað að fá vinninginn í einni greiðslu en við það lækkar heildarupphæðin niður í 2,3 milljónir dala. Það er engu að síður dágóð summa sem ætti að geta nýst Stu og fjölskyldu hans vel á næstu árum.