Fram að þessu hefur Norðurpóllinn verið einn þeirra fáu staða sem túrismi hefur ekki enn náð sér á strik. Aðeins um 1.000 manns heimsækja þetta ískalda svæði árlega. En nú gæti orðið breyting þar á því í apríl á næsta ári opnar fyrsta hótelið á Norðurpólnum. Það verður þó ekki á allra færi að heimsækja Norðurpólinn og gista á hótelinu því ein nótt mun kosta 95.000 evrur en það svarar til um 13 milljóna íslenskra króna.

Hótelið verður aðeins rekið í takmarkaðan tíma á Norðurpólnum en það er fyrirtækið Luxury Action sem stendur á bak við verkefnið. Ekki verður reist hefðbundin hótelbygging heldur verður 10 upphituðum smáhýsum komið fyrir á staðnum. Þar geta gestir síðan sofið undir stjörnubjörtum (hugsanlega) himninum.

CNN hefur eftir Janne Honkanen, stofnanda Luxury Action, að Norðurpóllinn sé einn einangraðist áfangastaður heims. Þar hafi aldrei verið möguleiki á þægilegri gistingu en að nú verði ráðin bót á því.

Stærsta hluta ársins er ekki hægt að komast til Norðurpólsins vegna slæms veðurs en það er hægt að komast þangað með þyrlu í apríl og skipum í júní og júlí. Inni í 95.000 evru gjaldinu er tveggja nátta gisting á Svalbarað, flug fram og til baka til Norðurpólsins, ein nótt á hótelinu, matur og leiðsögn.

Hótelið verður síðan tekið niður og flutt aftur til byggða.