Bandaríski stórfjárfestirinn og milljarðamæringurinn Carl Icahn ætlar að flytja heimili sitt og fjárfestingafélag til Miami á Flórída frá heimaborg sinni New York. Þetta gerir þessi 83 ára milljarðamæringur til að sleppa við að greiða eins mikið til samneyslunnar.

Bloomberg skýrir frá þessu. Fram kemur að Icahn sé fæddur og uppalinn í Queens í New York. Hann er meðal ríkustu manna Bandaríkjanna en auður hans er talinn vera rúmlega 20 milljarðar dollara.

Flórdía er eitt af sjö ríkjum Bandaríkjanna sem innheimtir ekki tekjuskatt af einstaklingum en í New York er slíkur skattur innheimtur og nemur han 8,82 prósentum. Hvað varðar fyrirtækjaskatt þá er hann 5,5 prósent í Flórída en 6,5 prósent í New York.

Auð sinn hefur Icahn eignast í gegnum fjárfestingafyrirtækið Icahn Enterprises en markaðsverðmæti þess er tæplega 14 milljarðar dollara.

Bloomberg segir að flutningarnir séu fyrirhugaðir næsta vor og hafi Icahn boðið starfsmönnum bónusgreiðslu ef þeir flytja með til Flórída. Hann vildi sjálfur ekki tjá sig um málið við Bloomberg.