73 ára indversk kona eignaðist tvíbura, stúlkur, á fimmtudag í síðustu viku eftir að hafa farið í tæknifrjóvgun. BBC hefur eftir Uma Sankar, lækni konunnar, að henni og dætrunum heilsist vel.

Nýbakaða móðirin, Mangayamma Yaramati, sagði að hana og eiginmanninn, Sitamara Rajarao sem er 82 ára, hafi alltaf langað að eignast börn en hafi ekki orðið að ósk sinni þar til nú.

„Við erum ótrúlega hamingjusöm.“

Sagði Rajarao í samtali við BBC skömmu eftir að stúlkurnar komu í heiminn. Degi síðar fékk hann hjartaáfall og liggur nú á sjúkrahúsi.

Þegar hann var spurður hver ætti að sjá um stúlkurnar ef eitthvað kæmi fyrir þau hjónin vegna aldurs þeirra sagði hann að ekkert væri í þeirra höndum.

„Það sem gerist, gerist. Þetta er allt í höndum guðs.“

Hjónin segja að það hafi verið þeim mikilvægt að eignast börn og að þau hafi verið áreitt í þorpinu sínu vegna barnsleysis.

„Þau kölluðu mig barnlausu konuna.“

Sagði Yaramati.