Óvenjuleg sjón mætti köfurum undan ströndum Þýskalands á dögunum. Kafararnir voru sendir niður á hafsbotn vegna bilunar í athugunarstöð sem Helmholtz-miðstöðin í sjávarlífsrannsóknum kom fyrir á botni sjávar árið 2016. Ekki var um neina smá athugunarstöð að ræða, hún er 770 kíló og nokkuð fyrirferðarmikil.
Athugunarstöðin hætti skyndilega að senda gögn þann 21. ágúst síðastliðinn. Menn töldu að bilun hefði komið upp. Það sem mætti þó köfurunum var ekkert nema sundurtættir vírar. Búið var að fjarlægja athugunarstöðina og er ljóst að um mikið tjón er að ræða. Athugunarstöð af þessu tagi kostar um 40 milljónir króna.
Í frétt BBC kemur fram að hlutverk athugunarstöðvarinnar hafi verið að rannsaka ýmislegt er við kemur sjónum; saltmagn, súrefni, þörunga og metangas svo eitthvað sé nefnt. Hermann Bange, yfirmaður Helmholtz-miðstöðvarinnar, segir að gögnin sem stöðin hafi safnað séu ómetanleg.
Óvíst er hver fjarlægði athugunarstöðina og þá í hvaða tilgangi en ljóst er að um þaulskipulagðan verknað var að ræða. Athugunarstöðin er tæpa tvo kílómetra frá landi og á rúmlega tuttugu metra dýpi. Þá er hún býsna þung eins og að framan greinir. Sérfræðingar telja nær engar líkur á að sjávardýr hafi nagað rafmagnskaplana í sundur og athugunarstöðin skolast í burtu með hafstraumum. Telja þeir líklegt að einhverjir óprúttnir aðilar hafi hreinlega stolið henni.