Kosturinn við sjálfvirkt bílastæðahús er að það þarf 40 prósent minna pláss undir það en hefðbundin bílastæðahús. Slík hús henta því vel í gömlum borgarhlutum þar sem pláss er af skornum skammti.
P-snurran er hringlótt og fjögurra hæða. Ökumenn aka inn í komusal þar sem bíllinn er settur á lyftu og fluttur í laust stæði. En í lok júlí bilaði stjórnkerfi hússins vegna ofálags á rafkerfið. Síðan þá hefur hvorki verið hægt að setja bíla inn í húsið né taka bíla út úr því.
Af þessum sökum hafa 18 bíleigendur ekki séð bíla sína síðan í lok júlí og fá þá í fyrsta lagi í september og það ekki fyrr en seinnihluta mánaðarins.
Stjórnkerfið er ítalskt og bíða Svíar nú eftir tæknimanni frá Ítalíu til að leysa vandann. Hann kemst hins vegar ekki fyrr en seinni hluta september.
Bíleigendurnir óheppnu hafa fengið bílaleigubíla frá bílastæðasjóði Stokkhólmsborgar og fá að leggja ókeypis í öðrum bílastæðahúsum á meðan vandinn er óleystur.