Það var veiðimaðurinn Thomas Nelson sem fann Button í neðanjarðarbyrgi sem hann hafði útbúið sér og komið sér fyrir í. Í samtali við WSAW sagði Nelson að niðursuðudósir og pappakassar hafi verið úti um allt. Neðanjarðarbyrgið var langt inni í skógi og því fjarri alfaraleið. Nelson sagði að algjör tilviljun hafi ráðið því að hann fann byrgið, það hafi verið nær útilokað að átta sig á tilvist þess nema vita að eitthvað væri þarna.
Eftir að hafa staðið fyrir utan byrgið í smá stund og safnað kjarki fór hann inni byrgið sem var ólæst.
„Ég opnaði dyrnar og gekk inn. Það voru niðursuðudósir og pappakassar út um allt. Ég hugsaði með mér að ég yrði að fara lengra inn. Þar sá ég hann liggjandi í rúminu.“
Hann gekk hljóðlega út og hringdi í lögregluna þegar hann var kominn út og í örugga fjarlægð. Hann beið síðan eftir lögreglumönnum og vísaði þeim á byrgið. Þar hittu lögreglumennirnir Button sem reyndist vera eftirlýstur fyrir mörg afbrot. Matt Kecker, lögreglumaður, sagði að svo hafi virst sem Button væri nánast feginn að hitta annað fólk og vera handtekinn.
Button hafði sett upp sólarrafhlöður og var með sjónvarp í byrginu.