Náttúruverndarsamtök í Brasilíu og víðar telja nær öruggt að skógareldarnir sem nú geysa í Amazon-skóginum hafi kviknað af mannavöldum. Skógareldarnir loga á mörgum stöðum.

Jair Bolsonaro, forseti Brasilíu og ríkisstjórn hans, hefur legið undir harðri gagnrýni vegna eldanna enda Bolsonaro verið talsmaður þess að nýta landsvæði til ræktunar í stað þess að vernda skóginn.

Er talið að bændur og fyrirtæki á svæðinu beri jafnvel ábyrgð á mörgum eldanna í þeim tilgangi að nýta svæðið til iðnaðar. Margt bendir til þess að skógareyðing í Amazon hafi aukist eftir að Bolsonaro tók við embætti forseta.

Sjálfur hefur Bolsonaro látið að því liggja að náttúruverndarsamtök hafi sjálf kveikt eldana til að koma höggi á hann.

Í frétt CNN sem fjallar um málið segir að gervihnattamyndir sýni mikla fjölgun skógarelda í Amazon-skóginum á þessu ári. Þeim hafi raunar fjölgað um 80 prósent frá því á síðasta ári.

Alberto Setzer, vísindamaður við geimvísindastofnun Brasilíu, INPE, segir að 99 prósent þessara elda hafi kviknað af mannavöldum, annað hvort viljandi eða óviljandi.

Eldarnir í Amazon-skóginum eru sérstakt áhyggjuefni enda er skógurinn oft kallaður „lungu jarðarinnar“. Það skýrist af því að stór hluti þess súrefnis sem er að finna í andrúmsloftinu á rætur að rekja til Amazon.