Sorglegt en jafnframt óvenjulegt atvik átti sér stað á Hyatt Regency-hótelinu í Atlanta í Bandaríkjunum í gærmorgun þegar karlmaður féll af tíundu hæð hótelsins.

Þannig er mál með vexti að kona sem starfar við þrif á hótelinu gekk inn í herbergi mannsins. Þegar konan gekk inn sýndi maðurinn henni kynfærin á sér. Konan hafði samband við öryggisverði og þegar þeir hugðust handsama manninn reyndi hann að flýja.

Í frétt AP er maðurinn sagður hafa farið út á svalir og reynt að stökkva yfir á aðrar svalir. Ekki vildi betur til en svo að manninum skrikaði fótur með þeim afleiðingum að hann féll til jarðar og lést.

James White, fulltrúi lögreglu, segir að svo virðist sem um sorglegt slys hafi verið að ræða en rannsókn á málinu stendur yfir.