The Sunday Times skýrir frá þessu. Fram kemur að í skjölunum reyni ríkisstjórnin að setja upp líklegar afleiðingar útgöngu án samnings. Skjölin voru gerð af the Cabinet Office sem hefur það hlutverk að styðja forsætisráðherrann og ríkisstjórnina í að ná pólitískum markmiðum sínum.
Skjölin, sem eru undir dulnefninu Operation Yellowhammer, veita sjaldséða innsýn í leynilegan undirbúning ríkisstjórninnar vegna Brexit án samnings. Undirbúningurinn miðast að því að koma í veg fyrir algjört og afdrifaríkt hrun innviða landsins segir The Sunday Times.
Fram kemur að líklegt sé að skortur verði á matvælum, lyfjum og eldsneyti í marga mánuði eftir samningslausa útgöngu. Ástæðan er að þess er vænst að miklar truflanir verði á innflutningi til landsins eftir Brexit. Um 85 prósent þeirra flutningabíla, sem flytja vörur yfir og undir Ermasund til Bretlands, eru ekki undir það búnir að þurfa að fara í gegnum tollskoðun í Frakklandi áður en þeir geta haldið för sinni áfram. Tollskoðunin getur haft í för með sér að flutningabílarnir verða að bíða í meira en tvo daga í Frakklandi.