Aðalverkefnið í rannsókninni á hvarfi Anne-Elisabeth Hagen, eiginkonu norska milljarðamæringsins Tom Hagen, er nú að bera kennsl á ökutæki og fólk sem er talið tengjast málinu. Anne-Elisabeth var numin brott af heimili sínu í lok október á síðasta ári og síðan hefur ekkert til hennar spurst.

Ekki er að sjá að lausn sé í sjónmáli en lögreglan segist vera með nýjar upplýsingar í málinu en þeim ætlar hún ekki að skýra frá fyrr en í haust. Lögreglan telur litlar líkur á að Anne-Elisabeth sé á lífi en fjölskylda hennar er vongóð um að svo sé og greiddi meintum mannræningjum nýlega 10 milljónir norskra króna til að fá staðfestingu á að hún sé á lífi. En sú staðfesting hefur ekki fengist þrátt fyrir greiðsluna.

Tomm Brøsky, sem stýrir rannsókn lögreglunnar, sagði í samtali við VG að lögreglan ætli að setja aukinn kraft í ákveðna þætti rannsóknarinnar en vilji enn ekki skýra nánar frá þeim. Þetta séu þættir sem skipti gríðarlega miklu máli fyrir rannsóknina og lausn málsins. Það sé mikilvægt að skýra ekki frá þessu nú þar sem það geti skaðað rannsóknina.