Bresku þríþrautarkeppendurnir Jessica Learmonth og Georgia Taylor-Brown gerðu sig sekar um afdrifarík mistök þegar þær komu í mark í hlaupakeppni þríþrautarinnar sem fram fór í Japan á dögunum.

Í þríþraut er keppt í sundi, hjólreiðum og hlaupi og gafst efstu þátttakendum mótsins í Japan tækifæri til að ná lágmarki fyrir Ólympíuleikana í Tókýó á næsta ári.

Jessica og Georgia höfðu nokkra yfirburði í keppninni og voru þær nær samstíga alla hlaupaleiðina. Rétt áður en þær komu í mark ákváðu þær að haldast í hendur en það reyndust afdrifarík mistök. Samkvæmt reglum mega keppendur ekki haldast í hendur og leggja á ráðin um að koma á sama tíma í mark. Þær voru því báðar dæmdar úr leik.

Flora Duffy, keppandi frá Bermúda, sem kom þriðja í mark fékk því sigurinn á silfurfati.

Líklegt þykir að Jessica og Georgia taki þátt í þríþraut Ólympíuleikanna næsta sumar, enda hafa þær þegar náð lágmarkinu. Bretar munu senda þrjár konur og þrjá karla til að keppa næsta sumar og kemur það í ljós í maí næstkomandi hvort þær verði valdar.