Í kjölfar margra kvartana yfir berbrjósta konum sem nutu veðurblíðu við sundlaugar í Barcelona á Spáni hefur borgarstjórnin blandað sér í málið. Niðurstaða hennar er að konurnar megi vera berbrjósta á opinberum baðstöðum í borginni ef þær kjósa svo.

CNN skýrir frá þessu. Segja borgaryfirvöld að það væri hrein mismunum ef konum væri meinað að vera berbrjósta á þessum stöðum á meðan karlar mega það.

Í skýrslu, sem var birt í lok júní, kom fram að á mörgum opinberum stöðum í borginni væru reglur um hvernig konur áttu að klæða sig. Nú hefur þeim skilaboðum verið komið til allra þessara staða að ekki megi gera mismunandi kröfur til kynjanna um klæðaburð.