Stephen Michael West, 56 ára fangi á dauðadeild í Tennessee í Bandaríkjunum, var tekinn af lífi í nótt. Stephen var sakfelldur fyrir tvö morð árið 1986 en fórnarlömbin voru móðir og dóttir hennar sem var á unglingsaldri.
Stephen er þriðji fanginn síðan í nóvember síðastliðnum sem tekinn er af lífi í rafmagnsstól í Tennessee. Stephen stóð einnig til boða að fá banvæna sprautu en valdi rafmagnsstólinn. Hann var úrskurðaður látinn átta mínútum eftir að aftakan hófst.
Stephen var 23 ára vaktstjóri á McDonald‘s þegar hann myrti Wöndu Romines, 51 árs, og fimmtán ára dóttur hennar, Sheilu, á heimili mæðgnanna. Braust hann inn á heimili þeirra í félagi við annan mann, Ronnie Martin sem var 17 ára á þeim tíma. Auk morðanna var Stephen sakfelldur fyrir að nauðga Sheilu.
Ronnie Martin var dæmdur í lífstíðarfangelsi fyrir sinn þátt í málinu en hann á möguleika á reynslulausn árið 2030.