Þýska ríkisstjórnin undirbýr nú bann við sölu og dreifingu plastpoka í verslunum þar í landi en samkvæmt samningi ríkisins og viðskiptalífsins verða verslanir nú að rukka fyrir pokana. Svenja Schultze, umhverfisráðherra, sagði um helgina að ráðuneyti hennar væri nú að undirbúa lagafrumvarp um bann við sölu plastpoka því samkomulag, sem gert var við viðskiptalífið til að draga úr notkun plastpoka, hafi ekki skilað tilætluðum árangri.

Hún sagði að markmiðið með nýju lögunum sé að binda enda á „notum og hendum samfélagið“. Hún gaf þó ekkert út um hvenær væntanlegt bann á að taka gildi.

Fyrir þremur árum samdi ríkisstjórnin við kaupmenn um að draga úr notkun plastpoka, meðal annars með því að byrja að rukka fyrir þá. Samkomulagið er ekki bindandi.

Samkvæmt tölum frá þýska umhverfisráðuneytinu hefur notkun á plastpokum minnkað um 64 prósent frá 2015. Plastpokar eru aðeins eitt prósent af þeim plastumbúðum sem eru notaðar í landinu. Af þeim sökum vill Schultze einnig ná samningum við viðskiptalífið um að draga úr notkun á plastumbúðum utan um ávexti og grænmeti.