Þegar lögreglan á Møn í Danmörku gerði húsleit í heimahúsi í Stege í nóvember 2017 yfirsást henni að lík hafði verið falið í húsinu. Líkið var af 34 ára konu sem hafði verið leitað um hríð. Það var ekki fyrr en tæpri viku síðar sem lögreglan fann líkið þegar hún framkvæmdi aðra húsleit. Líkið var illa farið en á því voru 97 áverkar.

Málið er nú fyrir dómi en 29 ára maður er ákærður fyrir að hafa myrt konuna sem hét Bettina Olsen. Lík hennar var falið undir nokkrum dýnum á heimili hans og ofan á þeim lá borðtennisborð sem hafði verið sagað í tvennt. Fyrir helgi kom fram fyrir dómi að það hafi verið hinn ákærði sem benti lögreglunni á hvar líkið væri falið.

Hann neitar að hafa myrt Bettina en viðurkennir að hafa falið lík hennar og sé því sekur um ósæmilega meðferð á líki.

Dómurinn á að taka afstöðu til hvort Bettina hafi verið myrt en ljóst er að andlát hennar bar að með óvenjulegum hætti. Réttarmeinafræðingar fundu 97 áverka á líki hennar, meðal annars var hún axlarbrotin og með brotinn hryggjarlið. Hún var einnig með för eftir band á hálsinum. Réttarmeinafræðingar segja að þau séu eftir að hún var bundin fast við höfuðpúðann í bíl sínum.